Dagur fimm

Þær gera það ekki endasleppt blessaðar vinnukonurnar.

Ekki voru þær fyrr komnar á stjá í morgun en þær voru farnar út á róló. Skömmu síðar kom önnur inn og bað um ílát - þær væru búnar að finna mat handa okkur - og alveg nóg til dagsins. Ég fór á eftir henni út að kanna málið. Þær voru búnar að finna fullt af hundasúru um allan róló. Slitu upp blöð og stöngla.  Blöðin  átu þær jafnóðum, en stönglarnir fóru í skálina og skyldu notaðir í hádeginu.

Sögðu þetta algengan hversdagsmat í Borgarfirði.

Við fengum svo reyndar annan mat með þegar að hádegi kom, og vorum allar saddar og sælar þegar við fórum í sundið.

Við höfum ákveðið að fara bara annan hvern dag í laugina og það passaði vel - í dag var sól og blíða. Júlía er á sundnámskeði, en kom svo út til okkar og var hjá okkur og kom með okkur heim. Mamma hennar fór í skólann í Reykjavík.  Hún tók Helgu Guðrúnu með sér sem er komin heim úr Vestmannaeyjum í helgarfrí af því hún á afmæli á föstudaginn.

Svo við vorum orðnar fjórar og fjölgaði enn eftir að heim kom, þá fékk Dýrleif Nanna að koma líka.  Við vorum lengi á róló og gerðum þar ýmislegt skemmtilegt.

Systurnar byrjuðu auðvitað á að kenna hinum að þekkja hundasúruna og kosti hennar í kreppunni. Svo tíndum við sprek og byggðum hús og þvottasnúrur með laufblöðum bæði fyrir þök og þvott á snúrunum. 

Svo bara fórum við inn og fengum okkur mjólk og kex og kleinur. 

 

Athugasemdir

[Foreldrarnir í Lissabon (IP-tala skráð) 25.6.2009 kl. 21:29]

Hundasúrur eru ríkar af bætiefnum og vítamínum. Þessar stúlkur eru að upplagi miklir áhugamenn um c-vítamínríkt fæði og engin furða að þær leggi áherslu á betra mataræði með hundasúrum. Tilvalið að nota hundasúrur til að lífga upp á matseðilinn. Hundasúrusalat, fiskur með hundasúrum og þannig.