Ráðist gegn illgresinu (í bókstaflegri merkingu)

Ég varð að bæta því við. Þessi fyrirsögn er alveg "brilljant" til að nota við ólíkustu tilefni. Það mætti til dæmis tala um að uppræta ofsaakstur, eða dóp og drykkjuskap. Líka gæti verið um að ræða að koma í veg fyrir rán og þjófnaði, ofbeldi, vændi, ofát, framhjáhald eða skipulagt einelti. Ég gefst upp. Það er of margt til í okkar fyrirmyndar þjóðfélagi, sem gæti flokkast undir dulnefnið "illgresi" til þess að ég geti tíundað það allt hér. Því miður.

En ég fór sem sagt á fjóra fætur í Mýrinni í dag og reytti kartöflugarðinn allan - með höndunum einum. Í hita og sólskini, sem er kjörveður til útrýmingar á þessu skaðræði, sem arfinn er. Og reyndar ekki færri en tíu aðrar tegundir af jurtum sem ekki eiga heima í kartöflugarði. Og þvílík tilfinning að sjá allan ósómann liggja eftir í götunum lamaðan af sól og hita. Allt steindautt eftir örskotsstund.  Ég var svo áhugasöm og ofvirk að ég laumaðist inná land míns næsta nágranna og reytti smá hjá honum. Nú er ég viss um að hann heldur að ég ætli að sölsa þá röð undir mig. En ekki vera hræddur minn kæri Vb. garðurinn þinn er þvílik arfadyngja að ég get vel unnt þér þess að eiga eina hreina röð.  Satt að segja eru þessar tíu raðir nágrannans svo skelfilegar að mér þætti það meiri háttar áskorun og væri mikill heiður að taka þátt í hreinsunarátaki.

En þá vildi ég hafa með mér níu félaga sem kunna vel til verka og góðan skemmtikraft á hliðarlínunni. Við myndum ljúka þessu á klukkutíma.

Rigningin er góð

Tvær hellidembur á einum degi og önnur nokkuð langdregin. Er hægt að biðja um nokkuð betra? 

Allt í einu varð himininn svartur og andaði köldu. Mæðgurnar sem voru i heimsókn töltu út í bakarí til að kaupa eitthvað með kaffinu. Svo áttu þær eftir að labba heim, sín með hvort barnið í vagni og kerru. Sólbrúnar í hlýrabolum.

Demban hefur náð þeim áður en kökurnar voru keyptar. Kannski urðu þær innlyksa í bakaríinu, ég hef þó frekar trú á að þær hafi bara skokkað heim og orðið gegndrepa. Þetta var svo góð rigning.

Eftir að skýin höfðu dottið niður á jörðina varð himininn aftur blár, þangað til næstu ský höfðu náð að verða til. Svo kom demban stóra langa og aftur hreinsaðist himininn. 

En það var þurrt í Þrastarskógi.

Hvernig ég varð svona forvitin um "allt í kring"

Það var þegar ég fyrir óralöngu flutti úr sveitinni á Selfoss. Ég hafði alltaf átt heima í sveitinni, sem heitir Hrunamannahreppur og heitir vonandi um alla framtíð.  Það er bara þar sem hreppar og þorp eru sameinuð sem skipt er um nöfn svo enginn veit almennilega lengur hvar hann á heima.

Alla vega, í sveitinni þekkti ég alla og vissi næstum því allt um mitt nánasta umhverfi. Og það fannst mér ákaflega þægilegt. Svo þegar ég kom á Selfoss, sem hét þá bara Selfoss og ég mun alltaf eiga heima á Selfossi, svo lengi sem ég fer ekki eitthvað annað. Já þegar ég flutti hingað þá lenti ég í þeim ósköpum að vita ekki nokkurn skapaðan hlut. Ég þekkti engan, ég vissi ekkert hvaða hús var hvar eða hver átti heima í því. Ég vissi bara hreint ekki neitt. Það var líklega þá sem þetta kom yfir mig, óskapleg forvitni um "allt í kring".

Mér gekk ágætlega, allt fram að Vestmannaeyjagosi, þá kom svo stór skammtur í einu af fólki að ég ruglaðist aðeins. En það jafnaði sig. En núna aftur á móti, er allt að lenda í klessu. Ef maður hittir í Kaupfélaginu(ég segi bara kaupfélag, það er alltaf verið að breyta) já ef maður hittir þar manneskju sem hefur átt hér heima fleiri ár en fimmtán, þá heilsumst við fagnandi.  Og ég hef ekki hugmynd um hvað allar göturnar heita eða hver á heima hvar. Stundum hugsa ég með mér "mikið hlýtur að vera notalegt að búa í Þykkvabænum".  Ekki er þetta aldurinn? 

Enn af dularfullu miðunum

Selfossbíó 1944 - var Selfossbíó byggt þá? Sennilega.

Íbúar á Selfossi - 1100 - 1200 í Dísarstaða og Hellishólahverfi. Þetta eru ekki bara sögulegar heimildir, hér eru framtíðarspár og alla vega annað nafnið á væntanlegu hverfi þekki ég ekki. Ég hélt að Hellishólar væru í Fljótshlíðinni.

Sunnulækur - 3 ár síðan, já það eru líklega 3 ár síðan Sunnulækjaskóli var tekinn í gagnið.

Hulduheimar - í haust? Bíðum nú við, miðarnir hafa verið skrifaðir á síðasta ári. Hulduheimar eru að verða ársgamlir. Mikill vindur? Hvers vegna það er svona skráð veit ég ekki, kannski var mikill vindur þegar skrifað var.

Brúin núna 1945 - 21. des. 1944 slitnaði gamla brúin. 2 mjólkurbílar - í vestur - 1 flaut á varadekki. Það kunna nú flestir heimamenn þessa sögu. Um það þegar brúin hrundi undan tveimur mjólkurbílum og bílar og menn fóru í ána. 

1913 - fleiri en tveir þurftu þeir að labba. það er um takmörkun á umferð yfir brúna á allra fyrstu árum.

Sun.3.feb.1941 þýsk vél loftárás á brúna og braggana. Féllu 3 hermenn.

Fossbæirnir frá 1500 - bara tún?  Sá sem skrifar miðana er ekki bara að grafa í gömlum staðreyndum, hann eða hún er líka að tryggja að nútíminn verði skjalfestur. Eða er þetta innflytjandi sem er að reyna að fræðast um sitt nýja "búsvæði"? 

Árans druslan - hún stakk af frá þremur litlum börnum

Ég hélt hún myndi nú reyna að þrauka þangað til þau væru orðin svolítið stærri. Þó karlauminginn léti sig hverfa var ekki þar með sagt að hún þyrfti að gefast upp. Kvenkynið á að standa sig betur en þetta. Fyrir rúmri viku var hún orðin ein,karlinn var farinn, en afkvæmunum hafði fjölgað úr einu í þrjú. Nú synda þessi þrjú litlu brunnklukkubörn um allan pollinn og leita að mömmu sinni en finna hana ekki. Og ég sá hana ekki heldur. Nú verð ég aldeilis að standa mig i fóstruhlutverkinu. Ég held að þau narti í laufblöð?

Ég er á réttri leið

Enda eins gott, sumarfríið er meira en hálfnað. Í dag tókst mér að prenta út fyrstu útgáfu af ferðasögunni til Englands. Fjörutíu og fimm síður. Þá er bara eftir að púsla henni saman við myndirnar og kannski þarf ég að fá myndir hjá einhverjum góðhjörtuðum ferðafélögum.   Svo er ég líka búin að finna skrifborðið. Það er ekki lengur á því kúfur af blöðum bæklingum og nótum. Bara þokkalegasta skrifborð.  Þetta er nú allt nokkuð. Kannski gekk svona vel af því ég fór, fljótlega eftir fótaferð og eina þvottavél, í laugina og lá þar til kl. tvö.  Guðbjörg var líka í lauginni og Júlía og Ívar. Veðrið var æðislegt. Svo voru bara tvær þvottavélar eftir og ein búðarferð. Mamma og Magga komu aðeins við og líka Guðbjörg og Júlía. Svo þurfti ég ekki heldur að hugsa um kvöldmat, af því ég fékk í gær glænýjan sjóbirting úr Sandvíkinni. Ég flakaði hann af alkunnri snilld og S.K. grillaði svo annað flakið í kvöld.   

Meira af gömlum blöðum

1963 gagnfr - hvað gæti það þýtt. Mér dettur í hug að þá hafi fyrst verið útskrifaðir gagnfræðingar úr Barnaskólanum á Selfossi.  Þá var enn enginn Sólvallaskóli til og tveimur árum áður útskrifuðust krakkar frá Selfossi með mér frá Skógaskóla.

Bankinn fluttur 1953 - gæti verið að þá hafi Landsbankinn, sem nú er, verið tekinn í notkun. Fluttur yfir götuna frá "Gamla" bankanum?  Þá var Púlli tannlæknir með stofu uppi á lofti á austurendanum og Margrét nuddkona var þar líka, hinumegin við ganginn.

1981 fjölbraut - Það hefur væntanlega verið þegar fjölbraut tók til starfa, ekki þegar húsið var tilbúið, það var miklu seinna.

1988 - 99 - Réttarholt til - á þeim árum hefur verið byggt við þá götu, og var þá komið langt austur í sveit.  merkilegt nokk - eins og allt hefur þanist út og suður - hefur ekki verið farið lengra í austur - með íbúðarhús. Bara BYKO og hesthús og velli.

Hvernig þekkjast femínistar frá öðrum "istum"

Ég bara spyr? Einhverjir útlendir "klámkallar" komu til landsins, bara svona til að nota miðana sína en ekkert til að klæmast.  Þegar þeir voru á rölti í höfuðborginni og fundu eitthvað lítið til að stytta sér stundir,  þá kom þar að þeir ráfuðust inn á samkomu hjá "feministum". Ég veit ekki hvort þeir skemmtu sér þar lengur eða skemur, en einhvernvegin komust þeir að því að þeir væru ekki æskilegir gestir. Hvernig sést svona á venjulegum kvöldfundi að fólk sé annað hvort femínistar eða klámistar? 

Foreldrar sem henda krökkum

Skoo - þegar Einar var töluvert yngri - svona 10 - 14, þá gerði hann það stundum til gamans  að hlaupa smá spotta þegar við vorum í bíltúr. Ég man til dæmis einu sinni að við vorum á Álfaskeiði, hann fór af stað á undan okkur til að gá hvað hann gæti hlaupið langt áður en við næðum honum. Við fórum þá upp fjall og hann var bara kominn töluvert langt. Ef við hefðum nú í ógáti farið hina leiðina - framhjá Birtingaholti og hann bara haldið áfram að hlaupa alla leiðina upp að Flúðum? Þá hefði kannski einhver fundið hann og haldið að hann væri yfirgefinn?  En við ætluðum ekkert að henda honum, það var bara misskilningur.  Einu sinni gleymdist líka Guðfinna við Úlfljótsvatn. Við vorum á mörgum bílum og allir héldu að hún væri hjá hinum. Á Þingvöllum uppgötvaðist óhappið og hún var sótt. Sat enn á sömu þúfunni grútfúl. Þá hefur hún örugglega haldið að það ætti að henda sér.  Svona getur allt mögulegt orðið af misskilningi.

Það sem mótmælendur vilja

Það eru þessir krakkar sem hanga hér á landi þessa dagana, ekki veit ég á framfæri hvers. Þau hafa það helst fyrir stafni að láta lögguna elta sig í grennd við álver og aðrar stofnanir tengdar virkjunum og stóriðju og virðast alltaf láta fjölmiðla vita hvert þau fara næst.  Þau hafa það helst að markmiði að vekja athygli og það gengur þeim vel. Sjónvarpið hleypur til hvert sem þau vilja. Ef það gerðist ekki væri ekkert varið í að standa í þessu.  Mér hefur hingað til fundist  sjónvarp allra landsmanna merkilegri stofnun en svo að hún láti svona - - -- nú má ég ekki segja ljót orð - §%$#&!§*?*$" - stjórna sér.