Hvað er námskrá?

Það hefur verið svolítið skemmtileg umræða í gangi í vinnunni síðustu daga.

Kannski vonum seinna að þessi umræða færi í gang af því að umræðuefnið hefur sveimað í kringum okkur árum saman.

Námsskrá grunnskóla.  Orðið "námskrá", eða eins og margir telja að rita skuli "námsskrá", varð víst til í Menntamálaráðuneytinu fyrir mörgum árum. Tilgáta vinnufélaga er sú að við tilurð þessa orðs hafi óheppinn starfsmaður ráðuneytisins látið frá sér fara orðskrípi sem ekkert þýðir og er í raun ekki til. Óvart orðið það á að gleyma einu essi, en ekki fengið sig til að leiðrétta seinna.  Við ýtarlega leit í virtustu orðasöfnum okkar finnst alls ekki orðið námskrá, það er ekki til. Námsskrá hins vegar er til og allir skilja hvað það þýðir

 Það má vel ætla að það muni vera erfitt fyrir ráðuneyti menntamála að játa á sig réttritunarmistök, miklu líklegra að eftir nokkur ár verði sú yfirlýsing  send út til okkar óbreyttra   "að hvort tveggja sé rétt" námskrá eða námsskrá.  Því hefur áður verið svarað þegar fræðimönnum verður á í messunni. "Það er bæði rétt".

En mikið væri nú gaman ef maðurinn sem bjó til orðið kæmi fram og segði kannski sem svo:     "Æ- æ - ég gleymdi alltaf að laga það. Ég gerði smá vitleysu þegar ég sendi frá mér reglugerðina þarna um árið, þessa um námsefnið í skólunum. Auðvitað átti það að heita Námsskrá grunnskóla með tveimur essum - annað essið bara datt óvart út". 

En kannski er blessaður maðurinn löngu dáinn, tíminn líður svo hratt. 

Athugasemdir

[Sigurður Hreiðar, 16.10.2009 kl. 11:12]

Það er nú svona, frænka sæl, að maður skilur ekki alltaf röksemdina. En ég held að um þetta gildi einhver regla sem ábyggilega heitir eitthvað. Þetta er eins og með bílstjóra og skipstjóra, sem ég var alltaf að burðast við að skrifa með tveimur essum þar til besti prófarkalesari sem uppi hefur verið með þjóðinni, Ásgrímur heitinn Pálsson, bróðir Bjarnar sem til skamms tíma var safnstjóri í þinni heimaborg, hreinlega bannaði mér að skrifa þetta svona. Var þó aldrei stórorður eða frekur, þó fastur væri fyrir.

Við getum kannski látið þetta fara í taugarnar á okkur en mér finnst þetta í sjálfu sér viðunandi, af því það fylgir ábyggilega einhverri reglu sem heitir áreiðanlega eitthvað en réttlætir að fyrri liður orðsins sé ekki hafður í eignarfalli. Persónulega þykir mér verra þegar hver menntamaðurinn eftir annan étur upp eftir hinum að eitthvað sé náttúrUlegt, þegar það er ósköp náttúrlega bara náttúrlegt!

Kv. í bæinn

SHH

[Olga Sveinbjörnsdóttir (IP-tala skráð) 20.10.2009 kl. 20:21]

Rétt er að einhverjir hafa borið við röksendum á borð við eignarfallsendingar eins og t.d. skipstjóri, en þá stendur eftir spurningin; Hvers vegna þekkir orðabók Háskóla Íslands ekki orðið námskrá en þekkir vel til orðsins námsskrá?

Kv. Olga Sv.

[Helga R. Einarsdóttir, 20.10.2009 kl. 20:47]

Stór spurning Olga og gaman ef einhver vildi svara. kv.

[Sigurður Hreiðar, 21.10.2009 kl. 12:00]

Ef vel er flett er ýmislegt sem Orðabók Háskóla Íslands þekkir ekki. Íslensk orðabók Eddu, ritstjóri Mörður Árnason, þekkir bæði námsskrá og námskrá. Og ýmislegt fleira fróðlegt.

Hvers vegna Orðabók Háskóla Íslands þekkir ekki námskrá er mér hulið ráðgáta. Fulltrúi hennar átti þó sæti í ritstjórn orðabókar Marðar.