Haustið er komið

Þetta á að verða myndablogg. Samt verð ég að segja svolítið frá því sem ég hef gert undanfarið og um helgina. Það kemur líka fram á  myndunum.

Síðustu vikur hef ég farið um bæinn, læðst inní garða, klifrað í trjám og tínt ber og fræ.

Ég læðist nú reyndar aldrei inní garð án þess að spyrja fyrst um leyfi.

Ég held að ég hafi náð ca. þremur fullum strigapokum að reyniberjum, þessum venjulegu sem allir þekkja, en svo  minna af mörgum öðrum  reynitegundum. 

Svo líka hlyn og gullregn, yllir og toppa og svo eitt og annað skemmtilegt.

Dýrleif kom hér einn daginn og hjálpaði mér að tína síðustu rifsberin í garðinum - og borða þau. Svo settum við reyniber í poka hjá sólblóminu fína.

Í dag tók ég vel til í gróðurhúsinu og safnaði saman fúksíunum öllum sem eiga að vara í vetrardvöl í skúrnum. Þó liggur nú ekkert á að setja þau inn, ekki farið að frjósa enn. 

Það er eins gott að mínu berjatímabili er lokið. Fuglarnir eru farnir að gerast ágengir og svo hefur rokið síðustu vikur lamið trén svo að berin hrynja af þeim. Ég var heppin að vera í stígvélum þegar ég óð berjaskaflana á stéttinni á leið í skólann.

En svona alveg aukalega. Ég notaði líka þessa helgi til að gera ærlega tiltekt í húsinu. Þarf ekki að líta á það fyrr en um jól.

Athugasemdir

[berglind haf (IP-tala skráð) 28.9.2008 kl. 22:15]

Sæl Helga

Er síðan hægt að panta hjá þér GULLREGN og annað flott á vægu verði? Reyndar þarf það að vera hérumbil fullvaxta tré svo það lifi í garðinum hér í suðurbyggðinni!!

Kv, Berglind

[Guðbjörg drithöfundur Helga,Sigurdórs og Helgu..., 28.9.2008 kl. 23:17]

Flottar myndir!

[Helga R. Einarsdóttir, 30.9.2008 kl. 18:34]

Berglind - það er velkomið að skoða alla möguleika á viðskiptum - kannski næsta vor. Nú er líklega best að koma sér upp vöruskiptasamningum útum allt þar sem peningar eru hverfandi og verða víst fáséð góss í framtíðinni.Ég get boðið tré, kartöflur og rófur af eigin framleiðslu.