Þá líður mér alltaf hálf illa

Það kemur fyrir að ég "eyði" vinum mínum en get samt aldrei vanist því.

Það er ekki eins og ég geri þetta af illum hvötum eða til gamans, frekar af illri nauðsyn eins og þegar ég tek til í húsinu eða elda kvöldmatinn.

Til dæmis núna - ég eyddi tveimur vinkonum án þess að láta þær vita fyrirfram. En þær voru bara alveg steinhættar að sýna nokkurt lífsmark. Höfðu reyndar gefið út yfirlýsingar um að þær nenntu ekki að standa í þessu bloggi. Var þá ekki alveg réttlætanlegt að ég "kæmi þeim fyrir kattarnef"? Mig grunar líka að þær séu orðnar uppteknar á öðrum vettvangi, "fésbókinni", en þar hef ég ákveðið að koma hvergi nærri.

Það er auðvitað af því ég treysti ekki sjálfri mér. Ég hef umgengist fólk sem er á barmi brottrekstrar úr vinnu vegna ofsalegrar fésbókarfíknar, ég hef orðið vitni að dramatískum vinslitum og grátklökkum samtölum á "trúnó", og ég hef heyrt að hverskonar pestir og vírusar finni leiðir inn á friðsælustu heimili í gegnum þetta fyrirbæri, fésbók. Ég vil ekki eiga þetta allt á hættu og veit líka að fari ég einu sinni af stað munu engin bönd halda mér og ég yrði væntanlega fljótlega atvinnulaus, grenjandi, vinalaus og fárveik af vírus sem enginn vissi hvaðan kom og engin lækning væri til við. 

Ég veit þetta eins vel og að ég var "heppin" að vera ekki uppi á hippatímanum. Almáttugur má vita hvað af mér hefði orðið þá? Mér hættir til að gera allt svona einhvernvegin "mikið". Alla vega var það svoleiðis einu sinni og gæti alveg verið enn.

Ég tek ekki sénsinn. 

Ég ætla bara að lifa áfram "gömlu góðu lífi", með þeim vinum sem nenna að líta hér við endrum og eins. 

Athugasemdir

[Josiha, 18.3.2009 kl. 21:47]

Facebook er líka bara bóla. Hún spryngur á endanum 

[Helga R. Einarsdóttir, 18.3.2009 kl. 22:16]

Þetta grunaði mig Jóhanna - "eitt allsherjar samsæri", sem verður svo að engu. kv.

[Guðbjörg drithöfundur Helga,Sigurdórs og Helgu..., 18.3.2009 kl. 23:57]

Gott hjá þér ... alveg rétt hjá JOSIHA 

Er kaka á morgun? afmælisstelpa

[Þorsteinn Sverrisson, 20.3.2009 kl. 19:01]

Það er eins gott að vera duglegur að kommenta svo niðurskurðarhnífur Helgu sneiði ekki af manni höfuðið :)

[mýrarljósið (IP-tala skráð) 22.3.2009 kl. 11:01]

Gvuð! ég gleymdi, var að vinna til 9 um kvöldið á Bakkanum og hugsaði ekki um neitt nema sjálfa mig.  Svo er bara allt í einu tíminn floginn.  Bæti úr þessu en til hamingju með daginn um daginn góða vinkona

[Helga R. Einarsdóttir, 22.3.2009 kl. 16:47]

Kveðja móttekin og vertu velkomin hvenær sem er. En það er nú ekki málið - Bakkanum hvað?

[Helga G (IP-tala skráð) 24.3.2009 kl. 00:35]

ómægod ég gleymdi að óska þér til hamingju með daginn um daginn! elsku amma mín, til hamingju:*

Elska þig

[Helga R. Einarsdóttir, 24.3.2009 kl. 18:22]

OMG! takk fyrir kveðjuna Helga mín.

Sendu mér nú póst með helstu upplýsngum um lífið í Babýlon. kv.