Nú bara skoðum við gamlar myndir, rifjum upp skemmtilegar sögur og hlægjum að öllu saman

Nýlega náði ég í þessar frábæru myndir frá æskuárum okkar systkina. Við vorum alin upp í lausagöngu, sem þýðir að við gengum að mestu sjálfala. En áður en við urðum það viti borin að kunna fótum okkar forráð varð skiljanlega að hefta útrásina með einhverjum ráðum.

Á fyrri myndinni eru tvíburarnir greinilega enn á þessu frumstigi. Þeir eru geymdir þarna í einskonar stíu, ekki ólíkri þeim sem notaðar eru um heimaalin lömb, eða stundum tófuyrðlinga sem teknir eru af grenjum og geymdir heima við til gamans. Þetta er grind með neti sem hafði svo smáa möskva að ekki varð skriðið þar út - þó mjóslegnir væru bræðurnir á þessum tíma. Þarna hefur þeim verið gerður dagamunur með heimsókn systranna af Bergstaðastræti. Af þessu sýnast þeir nokkuð glaðir en annar ( mér sýnist Haddi) notar þó tímann til að bora í nefið, enda lítið annað hægt að gera við þær aðstæður sem hann er þarna í.

Á hinni myndinni erum við í lauginni, en þar vorum við einhvern tíma flesta daga. Örn og annar tvíburinn horfa á ljósmyndarann og hjá þeim Helga Magg. Hinn tvíburinn lítur undan og ég hangi svo á einhverri spýtu nær.

 Á bakkanum sést þróin sem var steypt þarna til hagræðis fyrir konurnar sem komu í Hverahólmann með þvottinn sinn. Víða úr sveitinni, sumar með hest fyrir vagni, aðrar með poka á baki.

Þessi þró var svo fyllt af hveravatni á aðfangadag og látið kólna svo að hægt væri að baða okkur systkinin þar fyrir jólin.   Ég man bara eftir svona baði fyrir jól, en held nú þó að við höfum verið þvegin oftar en þá.

Athugasemdir

[Jórunn Sigurbergsdóttir , 7.10.2008 kl. 20:28]

Gaman af þessum myndum og frásögninni. Ég hef líka í undanförnum færslum farið til baka í tíma.

[Guðbjörg Elín (IP-tala skráð) 8.10.2008 kl. 22:17]

omg. barnavend okkar tíma myndi gera athugasemdir við þessari meðferð! en þetta eru skemmtilegar myndir það var allt svo gott í den.