"Ég er vinsæl og veit af því"

Þess vegna kemur mér ekki á óvart að ég fæ nú allmargar óskir um "vinasamband". Ég bið ykkur að taka það ekki illa upp, en ég hef ákveðið að halda þessháttar samböndum innan fjölskyldunnar. Mér hættir svo til að taka hlutina alvarlega og vil gjarnan gera vel við vini mína. Það gæti orðið til þess að ég færi að leita ykkur uppi, koma í heimsóknir eða senda smákökur fyrir jólin, ég hef bara ekki tíma í þessháttar núna. Sjáum til eftir starfslok, það er nokkurra ára bið. 

Það eru annaskipti í skólanum núna. Í dag var foreldradagur, þá komu foreldrar með börnunum að tala við kennarana og sækja vitnisburði. 

Ég fékk líka vitnisburð í dag. Ég fer reglulega til læknis sem reynir allt hvað hann getur að finna hjá mér einhverja kvilla, en gengur lítið. Auðvitað sem betur fer. Ég er búin að gera þetta í nokkur ár og ekkert er að mér. Kannski er illa farið með dýrmætan læknatíma með þessu, en það verður að hafa það. Í dag eins og áður labbaði ég hróðug út með "hvítan miða". Ef þið hafið aldrei farið með bíl í skoðun þýðir það fulla skoðun, ekkert að.  Ef eitthvað þarf að laga er miðinn grænn og í versta falli, þegar druslan er algerlega í rusli fær hún rauðan miða. En ég vona að það líði nú mörg ár þangað til ég lendi í því.

 

Athugasemdir

[Guðbjörg drithöfundur Helga,Sigurdórs og Helgu..., 14.11.2006 kl. 22:32]

Til hamingju með hreystið.

[GK, 14.11.2006 kl. 22:51]

Já, ég þyrfti að fara í skoðun...

[Jórunn Sigurbergsdóttir , 15.11.2006 kl. 17:11]

Til hamingjumeð að hafa svona góða heilsu Helga mín. Auðvitað virðum við hin það að þú viljir ekki vera í "vinaklúbbnum". Það sem ég sé samt gott við það er að við getum fylgst betur með því hvenær uppáhaldsbloggararnir okkar blogga.

Bestu kveðjur Jórunn