Er nágranninn að negla fyrir gluggana?

Þegar ég fór út áðan heyrði ég áköf hamarshögg handan við götuna. Getur verið að veðrið verði svo vont að maður ætti að setja hlera fyrir glugga? Ég vona ekki, en geri þó ráð fyrir því að ég verði fljót á leiðinni í skólann á morgun. Það á nefnilega að vera suðaustan átt og það hentar mér ágætlega, þá bara fýk ég beint í skólann. Svo í hádeginu á hann að snúa sér í suðvestan og það er líka fínt - ég fæ þá sömu þjónustu hjá veðurguðunum á heimleiðinni. Þetta hefur verði frekar annasöm vika. Það var aðalfundur kvennaklúbbs karlakórsins á þriðjudag, af því ég er formaður varð ég að halda ræðu og stjórna fundi, og líka útbúa brauðrétt handa kellunum með kaffinu. Svo í gær fór ég í vinnuna aftur kl. 5 og var til 9.30. Það var nefnilega verið að sýna leikrit 10. bekkjar - tvær sýningar. Það tókst bara furðu vel,sennilega mesta lánið hvað krakkarnir voru lítið stressuð þó ekki væri alveg allt eftir bókinni. "Hva me þa"? áhorfendur vissu hvort sem ekkert hvernig textinn er í handritinu.  Og þessi sem datt afturyfir sig útaf sviðinu meiddi sig ekkert að ráði, og svo fengu allir kökur og svala á eftir. Hvað er hægt að hafa það betra?

Á morgun- ef veður leyfir er svo myndakvöld hjá karlakórnum og þar er alltaf gaman. Reyndar skiptir engu hvernig veðrið verður, við komumst þangað einhvernvegin og svo förum við þá bara heim þegar lægir. En á Sunnudaginn þarf að vera fært til Reykjavíkur af því þá förum við snemma dags þangað til að vera við skírnina hennar Unu. Hún er líka eins árs þann dag.  Og hún er búin að heita Una allt þetta ár af því hún fæddist úti í Ameríku. En það verður auðvitað að skíra hana almennilega með vígðu vatni og presti.

Og svona að síðustu. Hún dóttir mín er komin frá Kaupmannahöfn, Hún fékk sér ekki tattú í þetta sinn og á laugardaginn var hún ekki á krá þar sem gestir voru skotnir eins og gæsir á hausti.   Farið varlega i vonda veðrinu.

Athugasemdir

[Jórunn Sigurbergsdóttir , 9.11.2006 kl. 22:18]

Það er nóg að gera hjá þér. Hefði ég hatt , tæki ég ofan fyrir þér. kveðjur Jórunn

[Guðbjörg drithöfundur Helga,Sigurdórs og Helgu..., 9.11.2006 kl. 23:36]

Fjúktu varlega...vertu nálægt staurum svo þú getir faðmað þá þegar rokið hrindir þér í 50 metr. hviðunum.

Skildún verða skírð Una?

[Helga R. Einarsdóttir, 9.11.2006 kl. 23:44]

Ég skal reyna að passa mig. Ég banka þá bara uppá í einhverju húsinu eins og ég sagði ykkur að gera. Ætli hún hljóti ekki að fá að halda nafninu? Góða nótt, mamma.

[Josiha, 9.11.2006 kl. 23:50]

Já tek undir með Guggu - fjúktu varlega!

[Pálína Vigdís Sigtr. (IP-tala skráð) 10.11.2006 kl. 09:11]

Allur er varin góður og er ekki bara rétt að negla fyrir alla glugga svo maður þurfi ekki að horfa á þetta leiðindar svarta veður??

[mýrarljósið (IP-tala skráð) 12.11.2006 kl. 12:25]

Það er æðisleg í svona veðri!  Þú fýkur ekki fyrr en í 40 metrum en keyrðu varlega!