Áramót í austurbænum

Það eru að verða fjörutíu ár - OMG. Eftir kl. 12.00 á miðnætti nýársnætur höfum við komið saman nokkrir nágrannar og gert upp árið og skipulagt það næsta.

Fyrst vorum við sex pör en með breytingum í tímanna rás erum við nú fern hjón, sem höfum öll þessi ár búið í sömu húsunum í sama hverfinu. Fyrstu árin vorum við hlaðin börnum og tókum þau alltaf með. Ekki endilega skipulagt hvar ætti að hittast í hvert sinn en fyrir kl. eitt voru allir saman komnir á einum stað. Heima hjá einhverjum okkar. Elstu krakkarnir voru úti að tína prik en þau yngri léku sér saman og duttu svo eitt og eitt úr hópnum, sofnuðu þá einhversstaðar í húsinu. Svo komu þau stærri inn, fengu snakk og gos og spiluðu þar til þau fór að syfja líka.

Það var ekki alltaf snemma sem foreldrarnir voru búnir að gera upp gamla árið, og skipulagið á því næsta gat tekið tímann sinn. En yfirleitt alltaf áður en hinir krakkarnir í hverfinu fóru út í seinni leiðangurinn til að leita að þeim prikum sem eftir urðu um nóttina vorum við búin að fara um hús gestgjafans og  leita hvert að sínum börnum, finna þau og bera heim í bólin sín. 

Nú eru þessar áramótasamkomur eitt það skemmtilegasta sem krakkarnir úr hverfinu minnast. En þau eru líka nokkuð viss um að ef þau fetuðu í fótspor foreldranna og bæru börnin sín sofandi á milli húsa kl.5.30 á nýársdagsmorgunn árið 2008,  myndu þau verða kærð til barnaverndarnefndar. Ég er ekkert svo viss um það - það er ekki nokkur maður á ferli til að sjá til þeirra - ég sá það í morgun .

Nú er ákveðið hvar á að koma saman næst, og það er skráð í bók - svona útaf minninu. Og við tökum með okkur á fundarstað einn flugeld hver hjón, til að skjóta upp saman. Þess vegna voru þessar sprengingar í austurbænum kl.3.00 í nótt, fyrirgefiði. 

Í nánasta nágrenni okkar má segja að hafi verið 27 fjölskyldur á fyrri árum. Nú eru eftir af því 12 frumbyggjar. Ég læt fylgja kort til gamans.

Athugasemdir

[Guðbjörg drithöfundur Helga,Sigurdórs og Helgu..., 1.1.2008 kl. 17:06]

Það gæti verið gaman næstu áramót að hóa þessum gömlu áramótabörnum saman...hittast í smá stund eftir miðnætti með ykkur gömlu gleðipinnum.(svona þeim sem eru á staðnum)

[Helga R. Einarsdóttir, 1.1.2008 kl. 17:10]

Ohhó - Hvað ætlar þú þá að gera við börnin þín?

Annars fín hugmynd. kv.  

[Berglind (IP-tala skráð) 2.1.2008 kl. 12:54]

Þið eruð nú meiru PARTÝPINNARNIR!!!!!!! Já það væri gaman að við "krakkarnir" fengjum að vera með í smá tíma!!! Við höfum nátturulega ekki sama úthald og þið!!! En gaman að halda þessu við.

En má ég spurja! Álftavatn! er það ekki eitthvað á vittlausum stað???? Ég þekki það bara í Grímsnesinu!!

Nýárskveðja

Berglind

[Sara (IP-tala skráð) 2.1.2008 kl. 15:13]

Hæhæ, takk fyrir kveðjuna og gleðilegt nýtt ár :) Ég kíki á síðuna þína líka við tækifæri :)
-Sara

[Ása Ninna Katrínardóttir (IP-tala skráð) 2.1.2008 kl. 15:23]

Kvitt.

[Helga R. Einarsdóttir, 2.1.2008 kl. 16:55]

Æ - Berglind mín - blessað barnið. Þarna var sko pollur sem var kallaður Álftavatn og þar undu krakkarnir sér heilu dagana og komu alltaf drullug og blaut heim. En líklega var það fyrri  helmingur barnanna í Austurbænum. Seinni helmingurinn - litlu börnin -  urðu að láta sér nægja Álftavatnið í Grímsnesinu.

[Jórunn Sigurbergsdóttir , 2.1.2008 kl. 17:13]

Skemmtilegar minningar þetta.

[GK, 8.1.2008 kl. 01:03]

Þetta kort er mjög merkilegt og verður jafnvel merkilegra þegar einhver fræðingurinn grefur upp þetta blogg eftir 100 ár.