Mótvægisaðgerð - leysir allan vanda

27.9.2007 | 20:35

Mótvægisaðgerð - leysir allan vanda

Mikið er gott þegar svona gullvæg orð verða til. "MÓTVÆGISAÐGERÐ".

Ef maður bara hefði kunnað það hérna á árum áður þegar allt var í hönk.

Atvinnuleysi, olíukreppa, uppskerubrestur, rigningasumur,mæðiveikin og almennt auraleysi. Mótvægisaðgerð hefði trúlega leyst þarna hvern vandann af öðrum. Mótvægisaðgerð bætir skaðann þegar byggja skal á skógræktarsvæði. Við getum endalaust mengað andrúmsloftið með bílunum okkar ef við plöntum bara nokkrum trjám í staðinn, það er mótvægisaðgerð. Hætta að veiða fiskinn í sjónum og bara malbika í staðinn, og af því að það er mótvægisaðgerð er það af því góða og allir eiga að vera glaðir.

Ef ég er ekki ánægð með launin mín get ég bara fundið mér aðra vinnu til viðbótar þeirri sem fyrir er. Karlinn getur ekkert verið að kvarta þó hann þurfi þá að sjá um allt heima, ég er að hamast við að framfylgja mótvægisaðgerð. Ef allt klárast þá úr ísskápnum hjá honum getur hann bara farið í skápinn hjá henni Jónínu í næsta húsi og sótt það sem vantar. Hún getur ekkert verið að væla yfir því, hann er bara að vinna við mótvægisaðgerð. Svona getur þetta eina orð bjargað heiminum. Hver skyldi hafa fundið það upp?

Mér dettur í hug annað orð, sem á sínum tíma var allt sem þurfti í utanríkissamskiptum Íslendinga. "Tvíhliða viðræður" mikið óskaplega átti hann Halldór Ásgrímsson margar tvíhliða viðræður við menn um allan heim. Þó þeir varla skildu orð af því sem hinn sagði voru samtölin harla góð af því viðræðurnar voru "tvíhlíða". Hvernig ætli "einhliða" viðræður fari fram?

Flokkur: Dægurmál | Facebook

Athugasemdir

Næsta bjargræðið verður tvítyngd stjórnsýsla. Mér skilst að hún sé nauðsynlegt til mótvægis við allar mótvægisaðgerðir.

Árni Gunnarsson, 28.9.2007 kl. 09:10

Mér sýnist vanta þarna eitt svona töfraorð sem var fundið upp fyrir allnokkrum árum: þjóðarsátt. Henni var einmitt komið á með einhliða viðræðum

Kveðja í bæinn

Sigurður Hreiðar, 28.9.2007 kl. 12:18

Já ekki er öll vitleysan eins.

Jórunn Sigurbergsdóttir , 28.9.2007 kl. 13:36

Hér var ég...

Guðbjörg drithöfundur Helga,Sigurdórs og Helgu..., 28.9.2007 kl. 17:03

Svo er það "beint tekjutap".... sem er þá örugglega ekki " óbeint tekjutap". :)

Eyjólfur Sturlaugsson, 28.9.2007 kl. 19:08

Ég var líka hér...

Josiha, 28.9.2007 kl. 19:14

Eru það ekki tvíhliða viðræður þegar þú talar íslensku út í búð og afgreiðslumaðurinn talar einhverja aðra lensku?????.

María von Iceland (IP-tala skráð) 29.9.2007 kl. 00:45

María von Iceland - ætli þú "hittir ekki naglann á höfuðið", ég hef bara alltaf misskilið þetta.kv.

Helga R. Einarsdóttir, 29.9.2007 kl. 10:08

Þetta er skemmtileg pæling. Eitt orð sem hefur unnið á að fara í taugarnar á mér er..þegar að fyrirtæki bjóða " heildar lausnir" hvað er það .. hvað felst í því .. að þar sé einhver sem vaskar upp ásamt því að sjá um bókhaldið og ræstingar á gólfum. Er svo einhver sem þvær bílinn þinn áður en þú ferð heim ásamt því að vera búin að fara í búðina fyrir þig. Heildar lausn er of stór setning til að fyrirtæki eigi að voga sér að nota það í auglýsingar. ISS sem er þvottabjarna og hreindýra fyrirtæki sem þrífur út um allan bæ. Ég myndi ekki hika við að fara fram á nudd og allt mögulegt þar sem að þeir auglýsa " heildar lausnir fyrir fyrirtæki" ekki spurning.

Erla Björg, Vilberg og Emil (IP-tala skráð) 30.9.2007 kl. 19:54

Ég myndi t.d. aldrei þora að semja við konu (kynjamisrétti), sem byði "heildarlausnir í heimilisstörfum". Ég gæti átt á hættu að hún færi bara ekkert heim til sín aftur og ég yrði að búa um mig í bílskúrnum! Það er rétt "heildarlausnir" er varasamt orð.

Svo hef ég verið að hugsa um tvö orð sem eru þessa dagana lýsandi fyrir allt sem er að gerast á Íslandi. Það eru orðin "fjárfestir" og "athafnamaður". Þessi orð voru ekki til í núverandi merkingu fyrir tiltölulega fáum árum. Athafnamenn þekktust þó víst, en þá í allt annarri meiningu.

Getur nokkuð verið að með þessum nútíma orðum sé átt við "fjárglæframenn" og "braskara" fortíðarinnar ?

Helga R. Einarsdóttir, 30.9.2007 kl. 22:12