Bæði get ég flogið og keyrt hvaða bíl sem er.

Við fengum nýjan bíl í gær - auðvitað rándýran eins og allir nýir bílar eru, en annars bara ágætis bíl - held ég. Ég var að hugsa á leiðinni austur að nú þyrfti ég að læra að keyra þennan nýja bíl, þá finnst mér best að fara ein eitthvað út í buskann til að kynnast gripnum. Ég hef svo sem oft áður þurft að gera svoleiðis æfingar, ég hef ekki tölu á öllum bílunum sem við höfum átt.

En svo hugsaði ég líka til þess þegar ég sofandi í rúminu mínu keyri stóru bílana. Það er gaman. Mig dreymir nokkuð reglulega alveg æðislega drauma, og þeir eru allir í sama dúr. Ég er að keyra, annað hvort rútu af stærstu gerð eða risastóran vörubíl með stórum aftanívagni, ég veit ekki einu sinni hvað það heitir.  Og það er ekkert á víðavangi sem ég stunda þetta sport, nei ekki aldeilis, ég er á götum höfuðborgarinnar, og ekki alltaf ljóst hvort ég muni ná beygju eða komast um þröng sund. En þetta tekst alltaf og ég vakna sigri hrósandi og ánægð með sjálfa mig.

Ekki nóg með það, ég get líka flogið. Ekki neinni flugvél eða þessháttar, ekki aldeilis,  mér dugir að rétta út handleggina og þá svíf ég um loftið eins og örn yfir Skötufirði.  Það er æðisleg. Að horfa yfir landið og sjá þar allt með augum fuglanna. Ég hef að vísu aldrei tekið mig á loft eða lent, en það hlýtur að ganga vel ég vakna alltaf óbrotin. 

Athugasemdir

[Josiha, 20.6.2007 kl. 23:44]

Þessir draumar boða bara gott

[Guðbjörg drithöfundur Helga,Sigurdórs og Helgu..., 21.6.2007 kl. 00:40]

Móðir mín er fugl sem er á leið í meirapróf ?

[Ninna (IP-tala skráð) 21.6.2007 kl. 00:46]

Skemmtileg færsla, eins og alltaf, og til hamingju með nýja bílinn.

[Jórunn Sigurbergsdóttir , 21.6.2007 kl. 17:10]

Helga ég flýg líka og það er gaman. Ég geri það alveg eins og þú en það er verra  með bílana oft get ég ekki bremsað eða eitthvað er að koma fyrir . Svo er ég oft farþegi í allskonr farartækjum, flugvélum ,strætó, lest, skipi. Ætli að þetta sé svona sammannlegur draumur? Ó já til hamingju með bílinn Helga mín. 

[mýrarljósið (IP-tala skráð) 21.6.2007 kl. 23:17]

Hvernig bíl?

[Helga R. Einarsdóttir, 22.6.2007 kl. 08:53]

Ég skal koma til þín - ég kann ekki að segja það. Jú annars ég kann það alveg - Toyota.