Hér veður allt í pestum

það er ekki glæsilegt að lesa lýsingarnar, af heimilum og frá skólum. Flensa, hálsbólga, kvefpest, upp og niðurgangur með tilþrifum.  Ég verð að viðurkenna að í okkar skóla er ástandið hreint ekki svona slæmt.  Þar sem eru ríflega fimmtíu starfsmenn er ekki mikið að fimm eða sex séu heima af einhverjum ástæðum. Og á meðan ekki vantar meira en tvo eða þrjá krakka til jafnaðar í 25 manna bekk erum við bara í góðum málum.

Að vísu verð ég að viðurkenna að það ældi einn á ganginum í dag og allmargir eru vart viðmælandi fyrir ýmsum truflunum í talfærum. Hæsi, hóstaköst, heyrnarleysi og miklar hnerrahviður teljast þessa dagana ekki til tíðinda. Sjálf er ég enn með eymsli í hálsi og þyngsli í höfði. Heyrnin er takmörkuð og framganga öll hin druslulegasta.

Þess vegna fór ég í dag og lét laga mig almennilega til, fór í klippingu og svo endurbætur á snyrtistofu. Hver veit nema mér takist að lifa mig inní útlitið og verði á morgun "ný og betri, innan sem utan"?

Athugasemdir

[Adda bloggar, 26.2.2007 kl. 21:32]

ekki er það nú nógu gott ástand hjá þér vinan, vonandi fer þér að batna

[Helga R. Einarsdóttir, 27.2.2007 kl. 19:48]

Takk fyrir komuna Laugatún. Hitt þarf ég aðeins að hugsa betur um. Ég vildi gjarnan vita hvort við erum ættingjar? Hm - í Eyjafirðinum - eru nokkur sambönd við frændfólk Jónasar Hallgríms?