Hert viðurlög við ofsaakstri

Uss - uss - uss - illa farið með góðan dag. Logn og sólskin úti, allir að gera eitthvað skemmtilegt - nema ég. Ég fór á röltið frekar snemma og var alveg þokkalega viðmælandi. Svo eftir hádegið ætlaði ég að lggja mig, skreið undir sæng og lokaði augunum. En mér tókst ekki að sofna, og þegar ég get ekki sofnað hættir mér til að fara að hugsa og það varð í þetta sinn. Ég hugsaði svo mikið að ég var á endanum orðin heitvond undir sænginni og henti henni af mér og settist hér.  Það sem ég hugsaði var tengt fréttum morgunsins um ofsaakstur vegadólga á suðvesturhorninu.

Hvers vegna er ekkert gert til að stöðva þetta brjálæði? Það er löngu ljóst að þau meðul sem nú eru notuð eru einskis nýt. Umferðaráð, gefur út tilkynningar um vel heppnaðar ráðstefnur, þing og fundi. þar sem skipað var í nefnd sem skila skyldi áliti til þingsins sem haldið verður------- . Sagan endalausa. Þetta ráð er jafn liðónýtt og neytendasamtökin. Ráðstefnur um umferðaröryggismál skila engu.                    

Löggan getur ekkert gert. þeir eru svo fáir að þeir komast varla yfir að keyra hvern annan í kaffi. En þó þeir hafðu ekkert annað að gera gætu þeir heldur ekkert gert. Þessir óvitar sem halda um stýri skaðræðistækjanna bera enga virðingu fyrir löggunni frekar en öðru.  

En það er eitt sem gæti komið illa við þá og það finnst mér að Bjö.Bja. ætti að laga núna áður en hann hættir. Nú þarf hann ekki að hafa áhyggjur af einhverju "sæti".  Hann gæti breytt viðurlögum við ofsa og ölvunarakstri. Það á að hirða skírteinið á staðnum af þessum fáráðlingum og gefa þeim kost á AÐ TAKA BÍLPRÓFIÐ AFTUR EFTIR FIMM ÁR.  Sumir þeirra hafa reyndar ekkert bílpróf, en þá yrði því frestað um fimm.  Sekt ætti að sjálfsögðu að fylgja, og væri hún ekki sanngjörn ca. verðmæti druslunnar sem svona er misnotuð? 

Ég skil alls ekki hvers vegna ráðamenn eru svona tregir til að herða viðurlög. Eru þeir hræddir um að krakkinn hennar Bibbu systur gæti lent illa í því? Eða að atkvæði táninganna lentu þá á röngum stað.  Varla kemur fyrir þá sjálfa að haga sér svona í umferðinni, ekki er það þess vegna? Svona viðurlög væru fælandi, það myndi, vonandi, draga úr því að krakkarnir tækju þessa áhættu. Það kæmi við kaunin á þeim sjálfum.

Verstur fjandinn að það virðist alltaf þurfa að veltast með allt mánuðum saman í enhverjum nefndum og ráðum. Er það bara til að einhverjir gæðingar fái tækifæri til að skrifa tíma á aðgerðina? Sjaldnast skila þessar nefndir nokkru afgerandi og aldrei neinu svo að það sé litið á það sem kórrétta niðurstöðu. þarf að senda til "yfirnefndar" og síðan umræðu hjá einhverjum öðrum.    Og á meðan leikur allt lausum hala á vegum og götum. Þið vitið það vel en eruð bara ekki menn til að taka á þvi - svei.   Svona var ég orðin vond undir sænginni. 

Athugasemdir

[mýrarljósið (IP-tala skráð) 17.2.2007 kl. 16:16]

Þú átt ekki að vera svona mikið í tölvunni þegar þú ert svona lasin .  Þér verður bara meira illt í höfðinu (ekki hausnum) og augunum og verður lengur að batna.  þetta var alltaf sagt þegar ég var lítil, reyndar um sjónvarpsgláp, en það sama á við um tölvuskjásgláp!

[Jórunn Sigurbergsdóttir , 17.2.2007 kl. 20:04]

VAr í heimsókn.