Hann Max er týndur

2.2.2007 | 23:12

Ein helgin enn og líka kominn febrúar. það á að fara að lesa passíusálmana í útvarpinu og þá eru Páskarnir á næsta leiti. Rosalega líður þetta hratt.

þemadagarnir eru búnir í skólanum. Við enduðum þá í dag með skrúðgöngu. Allir krakkar og flest annað starfsfólk skólans þrammaði í suddarigningu hringinn í kringum íþróttavöllinn.þegar við fórum framhjá Fjölbraut varð þar uppi fótur og fit og allir gæjarnir þustu í bíla sína til þess að elta okkur og keyra í kringum krakkaskarann með stælum. Og við sem héldum að þau væru orðin þroskuð í þeim skóla?

Þessir þrír dagar liðu eins og í ljúfum draumi. Enginn þurfti að læra nokkurn hlut, en kannski lærðum við samt heilmikið. Við vorum að kynna okkur líf og siði í öðrum löndum. það heitir "Fjölmenningarþema". Stundum áður á svona þemadögum, hefur verið mikill erill í skólanum, mikið haft fyrir að útbúa eitthvað sem síðan verður til eintómra vandræða. Drasl út um allt. En í þetta sinn var lítið þess háttar vesen og það sem eftir liggur er bara vel viðráðanlegt. Þetta voru góðir dagar.

Hann Max er týndur. Hann var við byggingarvinnu í Háaleitishverfinu í Reykjavík í dag og bara gufaði allt í einu upp. Hann hefur aldrei áður verið einn um nótt, enda bara tveggja ára og sjálfur eins svartur og nóttin. Labrador, aleinn í rigningu og roki og ratar ekki heim til sín. Alla leið austur fyrir fjall. Ég er einskonar amma hans og veit ekki hvort ég sef mikið í nótt.

Flokkur: Dægurmál | Facebook

Athugasemdir

Elsku amma, ég er fundinn og kominn í Sæluhlíð,ég sá svo flotta labrador gellu í Hvassaleitinu að ég varð að hitta hana.Mamma hennar hleypti mér inn um 4 leitið í dag þannig að ég var bara í góðum málum.Hún (mamman)hringdi í hundafangarann sem vissi að ég var tíndur og kjaftaði í hann.Sofðu rótt amma mín